Дар шаҳри Алматои Ҷумҳурии Қазоқистон Форуми байналмилалӣ таҳти унвони «Муосирсозӣ ба услуби чинӣ ва ҷомеаи сарнавишти ягонаи Чин ва кишварҳои Осиёи Марказӣ» баргузор гардид. Ин ҳамоиш бо ташаббуси Консулгарии генералии Ҷумҳурии Мардумии Чин дар Алмато, дар ҳамкорӣ бо Оҷонсии иттилоотии «Синхуа» ва Клуби коршиносии «Як камарбанд — як роҳ» баргузор шуд. Чорабинӣ дар Қасри дӯстӣ доир гашта, намояндагони сатҳи баланди дипломатӣ, донишмандон, коршиносон, рӯзноманигорон, намояндагони бахши хусусӣ ва ҷомеаи илмии кишварҳои Осиёи Марказиро гирди ҳам овард.
Форум ба як минбари муҳими мубоҳисавӣ оид ба дурнамои ҳамкориҳои минтақавӣ дар пасманзари чолишҳои глобалӣ табдил ёфт. Иштирокдорон бар он иттифоқи назар доштанд, ки модели муосирсозии Чин, ки ба рушди устувор, навоварӣ ва хусусиятҳои миллии худ такя мекунад, метавонад ҳамчун як роҳи самараноки рушд барои кишварҳои рӯ ба инкишоф хизмат кунад. Ин таҷриба, ба вижа, барои кишварҳои Осиёи Марказӣ, ки низ дар ҷустуҷӯи роҳҳои устувор ва мустақили рушд қарор доранд, аҳамияти амалӣ дошта метавонад.
Дар суханронии барномавии худ, Консули генералии Чин дар Алмато, хонум Тсзян Вэй, изҳор дошт, ки Ҷумҳурии Мардумии Чин омодааст ҳамкориҳои дӯстонаи худро бо кишварҳои Осиёи Марказӣ боз ҳам густариш диҳад. Ӯ зикр кард: «Дар моҳи июн Саммити дуюми “Чин – Осиёи Марказӣ” баргузор мегардад ва ҷониби чинӣ омода аст аз ин фурсати муносиб барои таҳкими эътимоди сиёсӣ ва стратегии дуҷониба, идомаи дӯстии чандасра, рушди муштарак ва ташкили ҷомеаи сарнавишти ягона бо сатҳи боз ҳам баландтар истифода намояд».
Сардори намояндагии Вазорати корҳои хориҷии Қазоқистон дар Алмато, Жанибек Абдрашов, таъкид кард, ки кишварҳои Осиёи Марказӣ ҳарчи бештар ба равандҳои ҷаҳонӣ ҳамгиро мешаванд. Ба гуфтаи ӯ, баъд аз баргузории нахустин Саммити «Осиёи Марказӣ – Чин», ҷунбиши наве дар ҳамкориҳо мушоҳида мешавад, бахусус дар самтҳои тиҷорат, сармоягузорӣ ва инфрасохтор. Ӯ таъкид кард, ки Қазоқистон ба ин формати ҳамкорӣ аҳамияти ҷиддӣ медиҳад ва фаъолона барои Саммити дуюм омодагӣ мебинад.
Раиси Шӯрои коршиносии «Як камарбанд — як роҳ» Булат Султанов зимни баромади худ иброз дошт, ки ҳамкориҳо байни Чин ва кишварҳои минтақа самаранокӣ ва дурнамои хуби худро собит кардаанд. Ӯ гуфт: «Мо аллакай натиҷаҳои воқеии ин ҳамкориҳоро дар соҳаҳои иқтисод, маориф, фарҳанг ва туризм мебинем. Зарур аст, ки ҷабҳаи иттилоотиро тақвият бахшем, то бештар ва рӯшантар моҳият ва фоидаҳои ҳамкориро ба ҷомеа нишон диҳем».
Муовини сармуҳаррири рӯзномаи «Сухани халқ» аз Ӯзбекистон, Руслан Кенжаев, итминони комил изҳор дошт, ки таҳкими шарикӣ бо Чин уфуқҳои нави ҳамкории созандаро барои кишварҳои Осиёи Марказӣ боз мекунад. Ба гуфтаи ӯ, татбиқи лоиҳаҳои муштараки инфрасохторӣ, рушди технологияҳои рақамӣ ва тавсеаи мубодилаҳои башардӯстона – ҳамаи ин заминаи устувореро барои рушди мутавозин ва пойдори минтақа фароҳам месозад.
Директори Маркази минтақавии кӯҳкории Осиёи Марказӣ Исмоил Даиров ба умқи таърихии робитаҳо миёни халқҳои минтақа ва Чин таъкид кард. Ӯ зикр намуд, ки натиҷаҳои Саммити аввали “Чин — Осиёи Марказӣ” аллакай ба дастовардҳои мушаххас овардаанд, дар ҳоле ки баргузории Саммити дарпешистода метавонад суръати ин равандҳоро боз ҳам афзоиш диҳад.
Сармуҳаррири расонаи минтақавии Asal Media, Анушервон Расулов, дар суханронии худ ба мушкилоти умумие, ки Чин ва кишварҳои Осиёи Марказӣ рӯ ба рӯ ҳастанд, ишора кард — аз ҷумла раванди табдилоти рақамӣ ва зарурати ҳифзи ҳувияти фарҳангӣ. Ӯ таъкид намуд: «Муосирсозии Чин метавонад на танҳо ҳамчун намунаи муваффақ, балки чун ангезандаи раванди шабеҳи ислоҳот дар кишварҳои Осиёи Марказӣ хизмат кунад. Дар ин раванд, ҳар кишвар метавонад таҷрибаи Чинро бо назардошти воқеиятҳои миллии худ ва афзалиятҳои дохилӣ мутобиқ намояд».
Форуми баргузоршуда дар Алмато таваҷҷуҳи баланди кишварҳои Осиёи Марказиро ба таҳкими ҳамкориҳо бо Чин ва густариши платформаи муштараки рушди устувор тасдиқ кард. Ин ҳамоиш як қадами муҳими навбатӣ дар ташаккули равиши воҳиди минтақавӣ нисбат ба масъалаҳои муосирсозӣ, ҳамгироии мутақобила ва посухи муштарак ба чолишҳои асри ХХI гардид.